Green Marathon Zürich, 22. März 2025

Am Donnschtig zobig, so om die Sebni, han i e Nachricht übercho
Vom Präsi vom 100 Marathon Club esch si gsi - hei jo derno
Mer organisiered am Samschtig morge en Green-Marathon – chom doch au no mit
Mer wördet ois freue - s’wär de Hit

Alles het passt bi mer dihei
Zufällig ben i gsi Fritig/Samsschtig ällei
De Andrea hani so halb Oberriet versproche – zom Glöck ned fescht
Denn de 40er om Züri esch mer entgägecho – als Tescht

Gar niemertem han i vo mim Vorhabe öppis gseit
Ond mi au ned i d’Trainingslischte vo den LG Horn itreit
So ben i am 9i a dem 22. März met es paar Kollegä be de Rio Bar gschtartet
I Gröppli send mer los grännt ond d’Fraue händ ab ond zu ofenand gwartet

Chorz vor em Zoo händs mi denn gscheckt ond i be de Räscht älleiggä grännt
Einigi händ nochhär gseit, d’Sonne häg scho rächt vom Himmel brännt
För mech esch guet gsi – es komischs Gfühl zwar, elei „müesse“ z’laufe
Aber i bemers jo gwönnt, mech öppedie zäme z’raufe

Noch em Lohrechopf eschs absi gange
Ond i ha denn scho chli afo plange
Witikä, denn entlang vom Wehrenbach bis is Seefeld ond an See
Lüt häts det gha - ich glaub, nienä e dä Schwiz no meh

Z’letscht han i mini Bei denn scho chli gmärkt
Aber i ha gwösst, besch bald am Zil ond denn werd gschtärkt
So esch es gsi: Gli beni weder be de Rio Bar aglangt
Ond ha denn det en feinä Istee verlangt!

I ha Freud gha ond ha d’Stimmig gnosse
Denn es häd sech för mech en Chreis gschlosse
I sägs jetzt ganz so näbebi
Es esch min 125. offiziellä Marathon gsi!

Jacqueline Keller

N.B. Resultat Green-Marathon Zürich, 22. März 2025, gemäss Garmin-Aufzeichnung J.K.:
43,6 km 787m aufwärts / 786 m abwärts (  ): Zeit 4h20.47